Një sherr masiv mes shqiptarësh ka përfunduar me arrestimin e gjashtë prej tyre. Ngjarja ka ndodhur në Rutigliano të Barit.
Sipas “Balkanweb”, ngjarja ka ndodhur në rrugën Via Mola, ndërsa shqiptarët e armatosur kacafyten mes tyre duke terrorizuar banorët.
Një dëshmitar ka dërguar për “Balkanweb” gjithë skenën e sherrit që ka terrorizuar banorët. Dëshmitari ka thënë se njëri nga grupet e përfshira në sherr është nga Kavaja dhe grupi tjetër nga Rrogozhina.
Sipas mediave italiane, njëri nga shqiptarët kishte pistoletë, ndërsa të tjerët kanë përdorur sëpatë, kamxhik dhe kaçavida.
Në pamje shihen se si dy nga shqiptarët përpiqen tja mbathin me makinë, por pas një rrotullimi përplasen me pemën. Pas kësaj, makinës i afrohen 4 shqiptarët e tjerë të cilët i nxjerrin nga makina me forcë dy bashkatdhetarët e tyre. Një nga shqiptarët shfaqet i plagosur në kokë dhe në fytyrë.
Fillimisht policia ka arrestuar 4 nga shqiptarët dhe më pas edhe dy të tjerët të cilët kanë tentuar të fshihen. Nuk dihen ende shkaqet dhe motivet e sherrit mes shqiptarëve të cilët kanë terrorizuar banorët. Të arrestuarit janë dërguar në paraburgim në pritje të gjykimit.