Hasan Pasha
Ka nisur vrullshëm fushata për zgjedhjet e pjesshme lokale në Bashkinë e Dibrës. Tre nga katër kandidatët në garë po takohen me zgjedhësit kudo, në qytetin e Peshkopisë dhe 14 Njësitë Administrative.
Gara duket e fortë dhe interesante. Hamendësimet për fitoren janë të ndryshme. Nuk mungojnë “analistët” lokal e kombëtar që bëjnë kalkulime dhe llogaritje për fituesin.
Kandidati më potencial në të gjitha drejtimet për të qenë qytetari numër një i Dibrës është Rahim Spahiu. Një specialist i zoti, i qetë, i aftë, punëtor, i ndershëm, komunikues, i qytetëruar.
Spahiu në krye të Bashkisë Dibër nuk vjen si një ektremist politik dhe nuk do të jetë “vegël” e asnjë subjekti politik. Ai aktualisht gëzon mbështetjen e shumicës së dibranëve, të majtë, të djathtë, të pavarur. E duan të gjithë sepse gjatë punës në këtë trevë ka treguar se nuk i sheh njerëzit nga teserat e partive që mbajnë.
Karriera e tij brilante si ekonomist nuk lidhet me individë egoist, mashtrues, intrigantë, hileqarë, hajdutë, arrogantë, mercenarë dhe të paaftë. Është hera e parë që kandidati socialist Rahim Spahiu u kërkon votën dibranëve. Nuk i ka mërzitur fushatë pas fushate, nuk është bërë i bezdisshëm derë më derë.
Politikanët që mbështesin kandidatët e tjerë kanë një mal me akuza. Njëri është shpallur “non grata” nga një superfuqi e botës. Tjetri e ka humbur rrugën në oborrin e SHQUP-it. Ndërsa çifti Meta-Kryemadhi janë testuar në Dibër dhe më herët dhe kanë dalë me “këpucë të kuqe”.
As Rahim Spahiu dhe as njerëzit që e rrethojnë nuk janë akuzuar për afera korruptive. As ai dhe as të afërmit nuk akuzohen për mitmarrje, për shkelje të rënda të ligjit. Asnjë dibranë nuk thotë se u kanë “futur duart” në xhep për vende pune apo afera të tjera të ndyra.
Dibranët janë njerëz të zgjuar. Ata e dinë se Qeveria Rama ka investuar dhe do të investojë për Dibrën. Le të kujtojmë vetëm Rrugën e Arbërit, këtë ëndërr të bërë realitet nga kjo qeveri, për të mbështetur pa rezerva përfaqësuesin e kësaj mazhorance.
Janë më shumë se 100 arësye që kandidati socialist Rahim Spahiu të jetë fitues në zgjedhjet e 6 marsit.