Kryeministri Edi Rama ka zhvilluar një takim me qytetarët në Durrës në kuadër të Këshillimit Kombëtar, duke kërkuar mendimin e tyre lidhur me disa vendime që duhet të ndërmarrë qeveria.
Rama e nisi fjalën me kursimet e emigrantëve shqiptarë për të depozituar paratë e tyre në bankat shqiptare.
Kryeministri thotë se për të bërë një ligj të tillë duhet marrë edhe mendimi i qytetarëve për shkak se edhe vetë brenda mazhorancës socialiste ka mendime të ndryshme.
“Çështja e kursimeve të emigrantëve në lek të padepozituara në bankë. Të gjithë emigrantët kanë pasur një fillim të vështirë, të gjithë kanë kursyer para që një pjesë kanë mundur t’i sjellin këtu pjesë-pjesë, por një pjesë i kanë mbajtur cash në shtëpi dhe për ta është e pamundur që ato para t’i çojnë nëpër banka në vendet ku janë. Dhe këtu nuk bëjmë fjalë për para të fituara në aktivitete kriminale. Këtu bëjmë fjalë për paratë e fituara me punë. Është një vendim që ka edhe kundërshtinë, një kundërshti që vjen edhe brenda nesh sepse këto janë vendime që çojnë në ligje amnistie për kursimet e padeklaruara të njerëzve dhe në këtë rast fokusi ynë janë emigrantët, të cilat mund të përdoren edhe si mekanizma për pastrim parash. Ky është një risk. Nga ana tjetër ka edhe një kundërshti ose ftohtësi nga institucione partnere që shprehin këtë rezervë”, tha Kryeministri Edi Rama.