Sekretari i Përgjithshëm i PS-së, Damian Gjiknuri ka dhënë dëshminë e tij në Komisionin Hetimor për Inceneratorët, në cilësinë e ish-ministrit të Energjisë.
Ai iu përgjigj akuzave se ka fluturuar në mënyre private me Klodian Zoton e Mirel Mërtirin.
Gjiknuri duke treguar të dhenat e TIMS për udhëtimet e tij, tha se në datat që e akuzon PD, ishte ministër dhe kishte fluturuar për punë në Sofje në një takim me ministra të vendeve të tjera të Europës etj.
“Nxorra nga TIMS gjithë udhëtimët gjatë kohës kur kam qenë minister, nga të cilat 98% janë udhëtime pune.
4 ose 5 data përkojnë me zotin Gazmend Bardhi, nuk di nëse përkojne me Mërtirin apo Zoton sepse në fund të fundit bëhet fjalë për transport publik ku udhëtojnë mijëra vetë.
Dt 21. 3. 2013, ndodhem në Samitin e Sofies
23.01.2017 – Singapor, Forumi Investimeve
Nuk kam asnjë udhëtim privat dhe asnjë udhëtim me charter”, tha ai.
Jorida Tabaku: Zoti Gjiknuri e njihni Klodian Zoton, Mirel Mërtirin dhe Stela Gugalljan?
Damian Gjiknuri: Në lidhje me shtetasit që përmendët, zonjën Gugallja nuk e njoh. Zotin Mërtiri e njoh si fytyrë. Zotin Zoto e kam takuar disa herë, në cilësinë e ministrit kur kam vizituar impiantin e Elbasanit në vitin 2017 dhe e kam takuar dhe njëherë tjetër në zyrë në lidhje me një investim që ka patur për një fabrikë qelqi, që nuk e di ç’a u bë me të. Më ka qëlluar të punojë me të në vitin 2001 në Ministrinë e Mbrojtjes, ku unë kam qenë Sekretar i Përgjithshëm dhe ai ka qenë kordinator në zyrën e ministrit të atëhershëm, por dua të shpjegoj se janë njohje krejt rrethanore dhe jo të afërta.