Protesta të shumta po mbahen në Rusi kundër luftës në Ukrainë. Të rinj, gra dhe burra kanë dalë në protestë, midis tyre madje edhe ata që i kanë mbijetuar luftës me regjimin nazist të Adolf Hitlerit.
Në tubimin e sotëm në Shën Petersburg, kundër luftës në Ukrainë, u ndalua edhe e mbijetuara Elena Osipova, e cila i mbijetoi bllokadës së Leningradit në vitin 1941. Në atë periudhë Gjermania naziste krijoi një bllokadë të zgjatur ushtarake, e ndërmarrë nga jugu dhe veriu kundër qytetit të Leningradit në Frontin Lindor të Luftës së Dytë Botërore.
Policia ruse ka arrestuar protestuesit në Shën Petersburg që kanë dalë kundër luftës me Ukrainën. Ata kanë bërë thirrje për të ndalur luftën dhe për t’i dhënë fund krimeve që po ndodhin atje.
Që pas pushtimit të Ukrainës më 24 shkurt, shumë rusë kanë dalë në protestë ndaj regjimit të Putinit për t’i ndalur një herë e mirë luftën. Ashtu si ditët e tjera, edhe sot policia ka ndërhyrë duke arrestuar shumë prej demonstruesve ndërkohë që lufta ka hyrë në ditën e saj të shtatë.