Kandidati i Partisë Demokratike për bashkinë Shkodër, Xhemal Bushati zhvilloi sot një takim në lagjen 3, një prej lagjeve më të rëndësishme të qytetit.
Takimi u zhvillua në pedonalen e Gjuhadolit, e cila është një zonë muzeale, por sipas banorëve ende pa një vëmendje siç duhet nga bashkia Shkodër.
Sipas njoftimit nga PD, banorët e lagjes 3 i kërkuan kandidatit të PD, Xhemal Bushati, që nesër si kryetar i bashkisë të rikthejë vëmendjen e munguar në atë zonë historike e kulturore në të cilën kanë jetuar personalitete të mëdha të artit, kulturës, letërsisë e historisë së Shqipërisë.
Kandidati Bushati tha se është i angazhuar që qendra historike të marrë zhvillimin e duhur.
“Faleminderit banorëve të lagjes 3. Sa herë i thërret Shkodra, janë aty. Jo rastësisht zgjodhëm G’juhadolin, por si dëshmi të degradimit dhe mungesës së vëmendjes. Janë angazhuar, me qytetarinë e tyre, ta fitojnë betejën për të ardhmen e Shkodrës. Larg urrejtjes, konfliktit, përbaltjes, por përkrah njëri-tjetrit. Bashkë do ta ç’rrënjosim të keqen që kërkon të lëshojë rrënjë dhe të përsëritet”, tha Bushati.