Një tjetër avion rus është rrëzuar nga ushtria e Ukrainës pas tentativës për t’u afruar në një objekt të infrastrukturës ushtarake ukrainase, raporton ukrinform.
“Njësia e mbrojtjes ajrore të Ukrainës ka rrëzuar një avion rus që po sulmonte një objekt të infrastrukturës ushtarake, afër qytetit turistik Zatoka, rajoni i Odesës,” sipas një postimi të Forcave të Armatosura të Ukrainës.
Ndërkohë pilotin, i cili u hodh nga avioni është në kërkim nga autoritetet ukrainase.
Rikujtojmë se më 24 shkurt, presidenti rus Vladimir Putin i shpalli luftë Ukrainës dhe nisi një pushtim në shkallë të gjerë. Trupat ruse po vrasin civilë, po bombardojnë dhe shkatërrojnë objektet kryesore të infrastrukturës ndërsa kanë goditur edhe shtëpitë e civilëve.
Ukraina ngriti një padi kundër Federatës Ruse në Gjykatën Ndërkombëtare të Drejtësisë të OKB-së në Hagë.