Gjykata e Lartë ka mbyllur aplikimet dhe ka bërë publike listën me 5 emrat që kanë shprehur interes për vendin vakant të kryetares së Gjykatës Kushtetuese, Vitore Tusha.
Përmes një njoftimi zyrtar, ky institucion thotë se pas përfundimit të afatit 30-ditor të pranimit të kërkesave, kandidatët që kanë paraqitur interes për plotësimin e vakancës janë: Brunilda Kadi, Elsa Miha, Holta Zaçaj, Juliana Latifi dhe Sandër Beci.
Në bazë të ligjit, lista e kandidatëve dhe dokumentacioni i tyre i është dërguar Këshillit të Emërimeve në Drejtësi për vlerësimin e kushteve dhe kritereve të emërimit të gjyqtarëve në Kushtetuese.
“Zëvendëskryetari i Gjykatës së Lartë, bazuar në nenin 125, pika 1 të Kushtetutës si dhe nenin 7/ç të ligjit nr. 8577, datë 10.02.2000, “Për organizimin dhe funksionimin e Gjykatës Kushtetuese të Republikës së Shqipërisë”, të ndryshuar, në datë 31.01.2022 ka bërë shpalljen publike për plotësimin e vakancës së pjesshme në Gjykatën Kushtetuese, si rezultat i mbarimit të mandatit të znj. Vitore Tusha.
Pas përfundimit të afatit 30- ditor të pranimit të kërkesave, kandidatët që kanë paraqitur interes për plotësimin e vakancës janë: Brunilda Kadi, Elsa Miha, Holta Zaçaj, Juliana Latifi dhe Sandër Beci.
Bazuar në nenin 7/ç, pika 1 të ligjit Nr. 8577/2000 “Për organizimin dhe funksionimin e Gjykatës Kushtetuese, të ndryshuar, lista e kandidatëve, si dhe dokumentacioni i paraqitur prej tyre i janë dërguar Këshillit të Emërimeve në Drejtësi për vlerësimin e kushteve dhe kritereve të emërimit të gjyqtarëve në Gjykatën Kushtetuese”, thuhet në njoftimin për mediat.
Aktualisht, Gjykata Kushtetuese ka 7 anëtarë, nga 9 që duhet të ketë për funksionim normal. Kryetares aktuale të Gjykatës Kushtetuese, Vitore Tusha, i ka mbaruar mandati si anëtare që në vitin 2017, por ligji e lejon të qëndrojë në detyrë deri kur të zëvendësohet. Kandidati që do të jetë zëvendësues i Tushës, do jetë me mandat të pjesshëm, pasi mandati i plotë përfundon në muajin mars 2025.