Kryetari i Partisë Demokratike, Lulzim Basha ka reaguar për herë të parë pas zgjedhjeve të ditës së djeshme në 6 bashkitë e vendit të cilat ishin pa kryetar, ku PD deri tani është renditur e treta forcë politike në të gjitha bashkitë. Basha u shpreh se procesi i 6 marsit ishte një anomali e një anomalie dhe se ka nevojë për një reformë të thellë.
“Së pari, dua që procesi të përfundojë dhe i bëj thirrje të gjithë numëruesve të vazhdojnë deri në fund procesin e numërimit. Procesi i 6 marsit ishte anomali e një anomalie. Anomalia e parë votimet moniste të qershorit, anomalia tjetër kryebashkiakët me të shkuar kriminale. Kur nuk ka asnjë reflektim për anomalitë, besoj se shumica dërrmuese e shqiptarëve e ka kuptuar nevojën për një reformë të thellë”, tha Basha.