Një zyrtar i lartë i Selisë së Shenjtë në Vatikan ka dënuar shpërthimin me bombë në një spital për fëmijë dhe maternitet në Mariupol, duke e quajtur si “të papranueshëm”.
Kardinali Pietro Parolin, Sekretari i Shtetit i Vatikanit, u tha gazetarëve se forcat ruse nuk kishin motive për të bërë një gjë të tillë.
“Unë them se bombardimi i një spitali është i papranueshëm. Nuk ka arsye, nuk ka motive për ta bërë këtë”, tha Parolin.
Vatikani e ka ofruar veten si ndërmjetës në luftën e Rusisë kundër Ukrainës. Reuters raporton se Papa Françesku theu protokollin diplomatik të premten e kaluar dhe bëri një vizitë në ambasadën lokale ruse për të transmetuar shqetësimet e tij për pushtimin.