Kryeministri Edi Rama i ka kthyer përgjigje disa prej qytetarëve që kanë komentuar pas reagimit të tij lidhur me protestat e zhvilluara për rritjen e çmimeve.
“Thirri mendjes se populli nuk është non grata po ka dalë për të drejtat e tyre që të mos fusi dorën askush në xhepin e tyre.”, shkruan një komentues.
Rama nga ana tjetër e ka sqaruar se populli është fjalë e madhe dhe se nuk është dhe as nuk përfaqësohet nga grupi i personave që dëshirojnë vetëm sherr dhe dalin nëpër protesta duke mos pranuar faktet.
Sipas kryeministrit njeriut që i preket xhepi nuk duhet të sulmoi qeverinë e cila prej shumë muajsh paguan diferencën gjithnjë e më të madhe mes çmimit real të energjisë dhe asaj në faturën e cdo familjeje. Ai tha se këtë luftë nuk e nisi Shqipëria, por tani duhet ta përballojmë të bashkuar me dinjitet, sepse tragjedia e vërtet është ajo që po ndodh në Ukrainë dhe jo kjo këtu.
Edi Rama: Populli është fjalë e madhe shumë, nuk janë as njëmijë as dymijë dhe as dhjetë mijë vetë po deshe, të tërhequr në rrugë nga njerëz pa arsye, të cilët nuk pranojnë faktet dhe shajnë e bëjnë thirrje për sherr! Sa për të drejtat, ato të siguroj që i di shumë mirë dhe i mbroj me të gjitha fuqitë, por kur një luftë prek xhepin njeriu nuk i turret qeverisë me të shara, ndërkohë që qeveria paguan prej muajsh diferencën gjithnjë e më të madhe mes çmimit real të energjisë dhe çmimit në faturën e çdo familjeje! Kjo është e papranueshme dhe prandaj këtë s’e bën kurrë populli, po manipulatorët e mirënjohur që hedhin gurin e fshehin dorën, duke nxjerrë nëpër rrugë fanatikët e tyre për të ndjellë njerëz të mërzitur e të keqkuptuar me situatën! Këtë luftë që nuk e nisi Shqipëria, nuk e ndalon dot Shqipëria dhe nuk e di askush sa do të vazhdojë, duhet ta përballojmë të bashkuar me të vërtetat dhe me durim e dinjitet, sepse tragjedia e vërtetë është ajo që ndodh në Ukrainë, ndersa ne do t’ia dalim edhe kësaj siç ia dolëm të tjerave më parë!