“I vetmi moment që bashkove demokratët ishte për dorëheqjen tënde”, kështu iu drejtua deputeti Belind Këlliçi kryedemokrati Lulzim Basha, duke thënë se sipas tij ai është shkarkuar në Kuvendin Kombëtar më 11 dhjetor të vitit të kaluar.
Duke e cilësuar si “kolegë”, Këlliçi tha se Basha nuk është zgjidhja e krizës brenda Partisë Demokratike, edhe pse në mbledhjen me krerët e degëve të PD në selinë blu mbrëmjen e kësaj të diele theksoi disa herë se është i hapur ndaj gjetjes së një zgjidhjeje.
“Kolegu ynë Lulzim!
Ke dy ditë që dredhon live para kamerave. Selia e PD ndodhet në qendër të Tiranës, prandaj mos i bjer nga Kina!
I vetmi moment që bashkove demokratët ishte për dorëheqjen tënde, e cila është fakt i kryer pasi Kuvendi Kombëtar të ka shkarkuar nga funksioni më 11 dhjetor. Nuk priti humbjen e gjashtë.
Ti sot nuk je aspak pjesë e zgjidhjes.
Ke mbushur dynjanë sikur grupi ynë parlamentar është dakordësuar që Berisha të largohet. Sikur zëdhënës i grupit të ishe, me këtë gënjeshtër që ke thënë, do ishe shkarkuar njëzëri.
Mjaft me këto lojëra e marifete! Ka një kohë maturimi për të gjitha. Edhe për burrninë.”, shkruan ai.