Akti Normativ për ngritjen e Bordit që do të përcaktojë çmimit me te cilin do të shitet benzina, nafta dhe gazi në tregun me pakicë, ka përcaktuar marzhet e fitimit. Sipas dokumentit të publikuar në Fletoren Zyrtare, shoqëritë e tregtimit me shumicë do të kenë të drejtë të bëjnë një shtesë në çmim, jo më shumë se 1%, ndërsa për shoqëritë e tregtimit me pakicë lejohet një shtesë, jo më shumë se 5%.
Sipas formulës së miratuar, për përcaktimin e çmimit final, referencë do të jetë çmimi i shpallur nga bursa në Platts i një dite më parë nga mbledhja e Bordit të Transparencës, ndërsa më pas do të shtohet një vlerë premio prej 20 USD/ton dhe taksat e tatimet, sipas ligjit në fuqi. Këto të fundit përmbëjnë mbi 50% të çmimit final, me të cilin tregohen karburantet në vendin tonë. Paralelisht, Akti Normativ përcakton se çmimi tavan do të përcaktohen çdo javë ose kur Bordi e vlerëson të nevojshme për t’u mbledhur.
Çmimi i miratuar nga ky bord është i detyrueshëm për çdo pikë karburanti, ndërkohë që në rast të shkeljes së tij është Inspektorati Shtetëror i Mbikëqyrjes së Tregut, që do të ketë të drejtë aplikimin e gjobave, që për shoqëritë e tregtimit me shumicë është 10 milionë lekë, ndërsa për shoqëritë e tregtimit me pakicë 2 mln lekë. Në rast përsëritjeje, këtyre gjobave i shtohet edhe heqja e licencës së tregtimit.