Departamenti i Inteligjencës së Mbrojtjes ukrainase ka dhënë alarmin duke theksuar se forcat ruse kanë nisur luftë sistematike në dëmtimin e makinerive bujqësore në Ukrainë.
Sipas tyre me anë të këtyre veprimeve Rusia planifikon të lërë pa bukë jo vetëm Ukrainën, por disa shtete të botës që varen direkt nga gruri ukrainas.
Institucionet e sigurisë së Ukrainës kanë dalë me një njoftim, ku flasin për planin rus, që të dëmtohet bujqësia e tyre.
“Pushtuesit qëllimshëm po i dëmtojnë makinerinë bujqësore të Ukrainës. Raste të veprimeve të tilla sistematike janë regjistruar në Brovarsky, në rajonin e Kyivit”, thonë nga Inteligjenca e Mbrojtjes ukrainase.
Sipas njoftimit, veprimet e deritanishme të forcave ruse mbi bujqësinë ukrainase, kanë për qëllim dëmtimin dhe rrezikimin e të mbjellurave të periudhës së pranverës.
Kjo, sipas autoriteteve ukrainase, po bëhet me qëllim që të shkaktohet krizë humanitare, në rajone të ndryshme të Ukrainës.
Mirëpo, këto përpjekje të Rusisë, sipas Inteligjencës ukrainase, nuk kanë për qëllim dëmtimin vetëm të shtetit të tyre.
“Shteti ynë është një nga furnizuesit kryesorë nga shumë fusha bujqësore në tregun e Evropës dhe të Kinës”, thuhet në njoftim.