Gjykata Kushtetuese ka zbardhur vendimin e arsyetuar për mosshkarkimin e Presidentit të Republikës, Ilir Meta, duke hedhur poshtë kërkesën e Kuvendit.
Faktet e paraqitura si shkelje që lidhen me rendin dhe sigurinë publike dhe retorikën e presidentit gjatë fushatës elektorale në mbrojtje të votës, sipas Gjykatës, nuk përbëjnë shkelje të Kushtetutës.
Po ashtu, Kushtetuesja nuk arriti në përfundimin se Presidenti ka kryer shkelje të rëndë të Kushtetutës në drejtim të ushtrimit të funksionit si Kryetar i Shtetit dhe përfaqësues i unitetit të popullit, si dhe nuk ka konstatuar shkelje në veprimtarinë e tij që lidhet me marrëdhëniet me partnerët strategjikë dhe marrëdhëniet me jashtë.
“Gjykata, bazuar në analizën e kritereve të shkeljes së rëndë, nuk identifikon ndonjë normë kushtetuese të cenuar, pasi në lidhje me këto fakte Kuvendi nuk ka arritur të provojë ardhjen e pasojave në drejtim të cenimit të rendit dhe sigurisë publike. Edhe në këtë rast Presidenti nuk ka ushtruar veprimtari vendimmarrëse, nuk ka marrë ose ushtruar kompetenca të institucioneve të tjera dhe nuk është provuar ndonjë qëllim i tij për ndërhyrje në rendin dhe sigurinë publike”, thuhet mes të tjerash në vendim.