Kryeministri Edi Rama po zhvillon një takim me përfaqësuesit e biznesit në Durrës, ku ka folur për situatën aktuale të çmimeve në vend. Ai ka bërë edhe një krahasim me atë që po ndodh në vendet e tjera, duke marrë si shembull rastin e një shqiptari që jeton në Firenze të Italisë, i cili i kishte dërguar Ramës faturat e tij të energjisë dhe gazit që nga viti 2020 deri në vitin 2022 ku tregohej rritja e çmimeve.
“Më çonte dikush dje, një shqiptar i panjohur për mua nga Firenze, më dërgoi një faturë edhe unë e publikova. Edhe filluan disa media gjobëvënëse për bizneset kryesisht se mua nuk ka shans njeri të më shkojë gjobë, edhe filluan me ca fatura të tjera. Edhe më shkruante njëri sot në mëngjes, po ça janë këta thoshte. Po une aty në atë faturë kam edhe energjinë, edhe gazin. Se ka shumë fatura që janë të ndara, ka edhe të tjera që janë të bashkuara që nxjerrin atë sa ke harxhuar. Edhe më çonte edhe fatura të tjera që ishin të ndara, elektricitet, gaz nga fundi i 2020, fillimi i 2021 dhe fillimi i 2022. Në to tregohej rritja marramendëse. Pra rritje në faturat e të gjithë italianëve, e të gjithë shqiptarëve, e të gjithë grekëve, e të gjithë të njerëzve edhe në Kosovë, Maqedoni, etj. E këta vijnë e thonë shiko ça po bëjnë të tjerët. Ça po bëjnë të tjerët? Po marrin masa. E ne po marrim masa, madje po marrim një masë që se ka marrë njeri, që këtu do paguajmë ne, pra qeveria. Do paguajë buxheti I shtetit”, tha Rama.