Deputeti i PD-së, Roland Bejko, është në mesin e atyre që iu kthyen kundër kryetarit të partisë së vet, Lulzim Bashës.
Edhe pse ishte mbështetës i tij, Bejko tani kërkon dorëheqjen e Bashës. Në studion e Open Bejko tha se Basha kishte mundësinë të fitonte dinjitetin duke dhënë dorëheqjen, por nuk e bëri.
“Basha duhet të largohet, e kam shprehur direkt këtë mendim. Sigurisht pasi tha nuk kam humbur asnjë palë zgjedhje. Jam ndjerë i ofenduar, sepse kam qenë i bindur që Bashës i duhet dhënë një mundësi të kryesojë pa Berishën.
Kam qenë kundër Berishës dhe vazhdoj të jem, pasi është non-grata dhe e dyta që Berishën e kam quajtur njeriu që kthehet e konsumon kohën që do i takonte një elite tjetër politike. Kam artikuluar fort ndaj berishizmit si një praktikë politike që i duhet dhënë fund.
Basha mund të ikte nga kjo humbje duke fituar diçka, po të jepte dorëheqjen dhe të artikulonte fjalët e një politikani të madh, mesazhe prej burri shteti. Kishte rastin të fitonte dinjitetin, por nuk e bëri. Fenomeni që erdhi si më i riu, por iku si më i vjetri nga të vjetërit. Kryetar i një partie bosh. Të iki dhe t’i japë rrugë proceseve,” tha Bejko.