Parlamenti ka votuar pardje me 80 vota pro dhe 26 kundër, ligjin që parashikon penalitetet për bizneset që do të vijojnë të përdorin qeset plastike që nga 1 qershori, por jo për qytetarët.
Lidhur me këtë, ministrja e Mjedisit dhe Turizmit, Mirela Kumbaro, thotë për gazetaren Klementina Cenkollari në edicionin e lajmeve në MCN Tv, se tashmë sfidë në vete paraqet së pari vetëdijesimi i qytetarëve që nuk duhet të përdorim më këto qese të pareciklueshme, të cilat kthehen në dëm për shëndetin tonë.
“Disa amendime që ju bënë ligjit, gjatë debatit edhe në komisione, përfshirë edhe heqjen e gjobës për qytetarët që ne e pranuam, e rëndësishme është që u propozua një masë më e rëndësishme sa i përket tregtimit të qeseve, që nis nga gjoba, sekuestrimi i mallit e deri të heqja e licencës. Nëse me këto masa të forta do të arrijmë të ndërpresim burimin e problemit, pra jo prodhimit, jo tregtimit, dhe ndëshkimi i çdo akti propagande që shkon në shkelje, atëherë nuk ka pse shkon në treg dhe të jetë në duart e qytetarëve.
Pas gjashtë muajve u arrit votimi me sukses në Parlament me 80 vota pro, unë mendoj se kjo ishte pjesa më e lehtë, pjesa më e vështirë është tashmë sfida për zbatim në terren.
Kemi dy muaj kohë për të intensifikuar komunikimin tonë më publikun dhe për ta bërë të qartë se nuk do te lejohet tregtimi, prodhimi dhe importimi i qeseve plastike njëpërdorimshme, qese nën 70 mikron, kurse mbi këtë sasi dhe 10 kg e sipër, janë qese shumëpërdorimshme dhe nuk hiqen nga përdorimi.
Qesja është ndotësi më i madh i ujit dhe tokës, dhe sondazhet kanë treguar se ato përpunojnë në ujëra, lumenj e dete, dhe përmes ujit e tokës futen në zinxhirin tonë ushqimor, gëlltiten nga gjallesa të ndryshme të cilat na rikthehen neve në pjatë”, deklaroi Kumbaro.