Kombëtarja shqiptare është grumbulluar për 2 ndeshjet miqësore të marsit dhe aktualisht ndodhet në Barcelonë ku po kryen përgatitjet për përballjen ndaj Spanjës. Tekniku italian i kuqezinjëve, Edi Reja, ka filluar të mendojë konkretisht për të ideuar 11-shen që do të hedhë në fushën e lojës në ndeshjen ndaj Spanjës. Ka gjasa që tranjeri të mos e ketë të vështirë përzgjedhjen e lojtarëve që do të përbëjnë formacionin kryesor pasi performanca e lojtarëve e bën qartë dallimin.
Gjatë seancë së sotme stërvitore, Reja ka filluar të ndërtojë formacionin që do të zbresë nga minuta e parë në fushë në stadiumin e Espanjolit këtë të shtunë. Porta parashikohet të ketë Strakoshën titullar, me treshen “italiane” të përbërë nga Gjimshiti, Kumbulla e Ismajli para tij. Në krahë, Hysaj dhe Balliu kanë qenë mes titullarëve në stërvitjen e sotme, me futbollistin e Lacios të zhvendosur në të majtë.
Sa i përket mesfushës, vetëm Bare ka qenë pika e zakonshme fikse në rreshtim. Përkrah tij Reja ka vendosur debutuesin Asllani, ndërsa i ka besuar për momentin një fanellë titullari Qazim Laçit i cili po bën mjaft mirë në Francë.
Në sulm, nuk ka dyshime për Brojën, i cili parashikohet ta nisë duelin titullar dhe është testuar sot si i tillë, me Uzunin përkrah tij.
