Ministri serb i Mbrojtjes, Aleksandar Vulin, i njohur për deklaratat kërcënuese e fyese ndaj shqiptarëve e Kosovës, ka dalë me një të tillë edhe të enjten mbrëma.
Ai e ka quajtur “provokim të përmasave të mëdha” pezullimin e gjyqtares serbe nga Mitrovica që mori pjesë në takim me presidentin e Serbisë Aleksandar Vuçiç, të martën në Beograd. Ai shtoi se ky është një hap drejt përfshirjes së vendit të tij në luftë në Kosovë.
“Ky është hapi i parë drejt përfshirjes së Serbisë në konfliktet e armatosura në Kosovë, të cilat shqiptarët padyshim po i përgatisin. Nëse Bashkimi Evropian, i cili është sponsor i Marrëveshjes së Brukselit, nuk thërret takim në Bruksel dhe ndalon çdo lloj dhune kundër serbëve në Kosovë, atëherë me të drejtë mund të themi se sulmi i Kurtit nuk erdhi nga koka e tij e helmuar me urrejtje”, ka thënë Vulin, përcjell “B92”.
Për pezullimi i gjyqtares serbe, është shprehur edhe presidenti Aleksandar Vuçiç dhe kryeministrja Ana Bërnabiç.
Vuçiç tha se “Kurti ka vendosur ta sulmojë Serbinë”, ndërkohë Bërnabiç shtoi se Marrëveshja e Brukselit tashmë është e vdekur.
Pezullimin e gjyqtares serbe, Liljana Stevanoviç, e bëri sot Këshilli i Gjyqtarëve të Kosovës, pasi të martën u pa në takimin e Këshillit të Sigurisë Nacionale në Beograd, të thirrur nga Vuçiç.