Këtë të diel të 27 marsit është rikthyer sërish ora verore. Akrepat shkuan 60 minuta përpara në 2:00 të natës, duke bërë që ata të cilët duhet të ishin në punë këtë mëngjes, të kenë humbur një orë gjumë.
Por, e kujt ishte ideja që ora të ndryshohet?
Në vitin 1907, një anglez i quajtur William Willett prezantoi idenë e “Kohës Verore”, në mënyrë që njerëzit të mos i çojnë kot orët e çmuara të dritës gjatë mëngjeseve verore. Ai e mendoi këtë ide në mënyrë që t’i nxirrte njerëzit nga shtrati më herët, duke e ndryshuar orën. Ai propozoi se ora duhet të shtyhet për 80 minuta në katër hapa progresiv gjatë muajit prill dhe në të njëjtën mënyrë gjatë muajit shtator. Mirëpo kjo u ndryshua nga gjermanët të cilët vendosën ta adaptonin planin e tij për ta ndryshuar orën më 30 prill, 1916 – por jo për 80 minuta, por për 60 – kur ora ishte kthyer mbrapa në 23:00.
Më poshtë do të shikoni një dokument që i përket vitit 30 prill, 1916 ku vërteton momentin kur është ndryshuar koha për herë të parë në Shqipëri.
“N’Perandori të Austro Ungariës, nder vende t’xanuna n’Polen, Serbië dhe Malzi, mandej në Shqypnie si dhe n’Germanië e ndër vende t’anmikut qi kaa zaptue kaa m’u shtye n’veer koha nji sahat përpara”, thuhet në dokument.
