Në një ankand të mbajtur në Belgjikë, një pëllumb është shitur për një shumë marramendëse prej 1.252.000 euro, me çka është bërë shpendi më i shtrenjtë në botë.
Mediat lokale shkruajnë se pëllumbi flaman Armando, është shitur përmes internetit. Siç bëhet e ditur, pëllumbi postier i moshës pesëvjeçare, njëherësh kampion i shumëfishtë në garat në shtigje të gjata, është blerë nga një kinez, emri i të cilit nuk është zbuluar.
Megjithatë, theksohet se pëllumbi i blerë nuk do të përdoret për gara, por vetëm për qëllime riprodhuese. Më parë, në vitin 2017, në një ankand në Belgjikë një pëllumb ishte shitur për 400.000 euro.