Në kampin socialist, Grupi Parlamentar i kësaj force politike ka filluar prej kohësh konsultimet për emrin e Presidentit të ri të Republikës. Gjatë një prononcimi për mediat pas mbledhjes së zhvilluar, kryetari i Grupit Parlamentar të PS-së, Taluant Balla zbuloi një sërë detajesh lidhur me këtë çështje ku tha se deputetëve të PS u është kërkuar që të sjellin kandidaturat më të përshtatshme.
Mes të tjerash, Balla deklaroi se ai së bashku me ministren Elisa Spiropali dhe Damian Gjiknurin janë 3 të përzgjedhurit për të ngociuar me grupet e tjera parlamentare.
“Çdo deputet i PS gjatë fundjavës duhet të jetë prezent në territor dhe për të marrë vendimet që lidhen me angazhimet që lidhen me javën pasardhëse. Në 31 mars është seanca e radhës e Kuvendit, kemi diskutuar për çështjet e rendit të ditës. Po afron dita që në konferencën e kryetareve duhet të ketë një kalendar për zgjedhjen e presidentit. Në mbledhjen e grupit kemi diskutuar se po afron dita që kuvendi duhet të ketë një kalendar që çon në zgjedhjen e presidentit të republikës. Jo më vonë se 24 maj duhet të ketë vazhduar procesi i zgjedhjes së presidentit. Kuvendi do marrë kohën e duhur për të zhvilluar këtë proces. PS ka udhëheqësinë e këtij procesi. Do zhvillojmë një proces i cili do jetë i hapur konsultimesh brenda suazës së Kuvendit.
Tashmë me mua do jetë dhe kolegia Elisa Spiropali dhe Gjiknuri si të mandatuar nga grupi parlamentar për t’u konsultuar me grupet e tjera parlamentare për të instucionalizuar një dialog konstruktiv për zgjedhjen e presidentit. Konsultimet kanë filluar brenda grupit parlamentar ku deputetëve u është kërkuar të vijnë me propozime konkrete që ne të kemi një short listë të atyre që mund të jenë kandidatura të mundshme”, u shpreh Balla.