Kampionati shqiptar i futbollit do të rikthehet sërish këtë fundjavë, pas një pushimi për shkak të ndeshjeve të kombëtareve. “Abissnet Superiore” ka hyrë në javën e 27-të, sfidat e së cilës do të luhen në 3 ditë të ndryshme.
Gjithçka do të nisë me supersfidën e kësaj jave e cila do të jetë ajo mes Kukësit dhe Tiranës, takim që do të luhet ditën e shtunë në orën 13:45. Edhe këtë herë verilindorët do të “shtegtojnë” në Rrogozhinë për të zhvilluar ndeshjen e tyre si pritës pasi ende nuk është gati stadiumi i tyre, ku sigurisht do të kërkojnë 3 pikët ndaj bardhebluve kryesues.
Sakaq, në stadiumin “Elbasan Arena”, ora 16:45 do të luhet një tjetër takim interesant, këtë herë për mbijetesën mes Dinamos dhe Egnatias. Të dy skuadrat, fitorja është e vetmja rrugëdalje në këtë përballe.
Dita e diel ka rezervuar vetëm një takim, ku Teuta pas disa muajsh që “shtegton” më në fund do të kthehet në “Niko Dovana” ora 16:45, ku do të presë Skënderbeun e Skënder Gegës, në një takim që pritet të jetë i luftuar.
Dy takimet e fundit të kësaj jave do të luhen ditën e hënë në të njëjtin orar. Vllaznia-Kastrioti do të zhvillohet në “Loro Boriçi” ora 17:45, me shkodranët që kërkojnë pikët për europën, ndërsa krutanët pikët për mbijetesën.
Po në të njëjtën orë do të luhet edhe Partizani-Laçi, sfidë që po ashtu do të luhet në “Elbasan Arena”. Demat dhe kurbinasit do të kërkojnë të rikthehen te fitoja për të vazhduar drejt objektivave të tyre.
Java e 27-të:
E shtunë, 2 prill 2022
13:45 Kukësi – Tirana
16:45 Dinamo – Egnatia
E diel, 3 prill 2022
16:45 Teuta – Skënderbeu
E hënë, 4 prill 2022
17:45 Vllaznia – Kastrioti
17:45 Partizani – Laçi