Janë zbuluar të tjera detaje lidhur me ngjarjen e rëndë të ndodhur në aksin rrugor Lushnjë-Fier, në vendin e quajtur Kolonjë, ku 38-vjeçari Betim Kastrati u gjet i pajetë brenda makinës së tij.
Burime zyrtare të policisë bëjnë me dije se 38-vjeçari ka vrarë veten me armë zjarri duke gjetur vdekjen e menjëhershme.
Mësohet se viktima punonte në portin e Durrësit dhe lohët e fundit ai kishte shfaqur shenja të depresionit. Betim Kastrati ishte i martuar dhe kishte 2 fëmijë të mitur. Ndërkohë, mësohet gjithashtu se 38-vjeçari shpesh herë ushtronte dhunë në familje. Gruaja e tij rezulton me urdhër mbrojtje të cilin e ka marrë prej disa kohësh dhe për rrjedhojë, 38-vjeçari e kishte të ndaluar t’i afrohej.
Paraprakisht pati dyshime për ndonjë vrasje dhe policia e hetoi ngjarjen fillimisht në këtë pistë, por më pas, policia konfirmoi se Kastrati kishte vrarë veten, në kushtet e depresionit.
Njoftimi i plotë i policisë:
Në aksin rrugor Fier-Lushnjë, në afërsi të rrethrrotullimit të Kolonjës, në një xhep rruge, brenda në automjetin tip “Volvo”, i parkuar në mënyrë të rregullt, është gjetur i pajetë shtetasi B.K, 38 vjeç, banues në Durrës.
Nga tërësia e veprimeve paraprake të kryera dhe provat e gjetura në vendngjarje dyshohet se shtetasi B. K., si pasojë e depresionit është vetëvrarë me armë zjarri pistoletë e cila u sekuestrua në cilësinë e provës materiale.
Grupi hetimor nën drejtimin e Prokurorisë vijon punën për zbardhjen dhe sqarimin e plotë të rrethanave të ngjarjes.