Këngëtari me famë botërore, Ed Sheeran ka fituar betejën gjyqësore në Gjykatën e Lartë mbi të drejtat e autorit të këngës së tij të kthyer në hit, e titulluar “Shape of You”, e cila u publikua në vitin 2017.
Të mërkurën, trupi gjykues që ishte ngarkuar për këtë çështje vendosi se kantautori nuk kishte bërë plagjiaturë këngën e vitit 2015 “Oh Why” nga Sami Chokri.
Sami Chokri është një “artist grime” por që njohet me emrin e artit si Sami Switch. Chokri ka pohuar se pjesa “Oh I” në këngën e Sheeran ishte “çuditërisht e ngjashme” me një refren “Oh pse” në këngën e tij. Por ky pretendim u hodh poshtë nga gjykata e cila mohoi të kishte kopjim nga ana e Ed Sheeran.
Ndërkohë, hiti “Shape of You” ka qënë kënga më e shitur në Mbretërinë e Bashkuar për vitin 2017 në Britaninë e Madhe dhe gjithashtu është kënga më e transmetuar ndonjëherë nga “Spotify”. Ajo u shkrua së bashku me bashkëpunëtorët e Sheeran, John McDaid të Snow Patrol dhe producentin Steven Mccutcheon, të cilët gjithashtu mohuan akuzat për kopjim.
Kujtojmë se procedurat ligjore mes Ed Sheeran dhe Sami Chokri-t u nisën në vitin 2018 dhe rezultuan në një gjyq 11-ditor në Londër, muajin e kaluar.
Gjatë dëshmisë së tij, Sheeran mohoi se ai “huazon” ide nga kompozitorë të panjohur pa u pranuar, duke këmbëngulur se ai ishte gjithmonë “plotësisht i drejtë” në vlerësimin e njerëzve që kontribuojnë në punën e tij.