Përtej variantit klasik, gjatë kësaj kohe janë krijuar edhe një sërë mutacionesh të tjera të cilat do ndikojnë që vaksina të bëhet jo vetëm e përvitshme, por të ndërtohet një universale. Mësohet se tashmë, shkencëtarët janë duke menduar seriozisht që të krijojnë një vaksinë me të gjitha variantet e koronavirusit që kanë dalë deri më tani.
Kjo nevojë ka lindur pasi, sipas asaj që deklarojnë ekspertët, vaksina ekzistuese mbron imunitetin tonë por jo në ato nivele që duhet.
“Brenda tetorit mund të kemi një vaksinë universale për të pritur dimrin”, u shpreh Skënder Brataj.
Është normale që viruset të pësojnë mutacione në vazhdimësinë e tyre dhe në fakt, ato janë me mijëra. Megjithatë, OBSH-ja thotë se vetëm disa prej tyre konsiderohen si të rëndësishëm për shkak se kthehen në kërcënues serioz për shëndetin publik.
Një prej tyre është edhe mutacioni “Omicron” dhe nga sa është konstatuar deri më tani, qarkullojnë dy nëntipe te tij. Prej kohësh, ai dominon në Europë për shkak të infektueshmërisë së lartë.
Ndërkohë, kompania amerikane “Pfizer” ka nisur nga puna për të krijuar vaksinën universale që të mbron ndaj të gjitha shtameve.