Ndonëse Lulzim Basha është larguar nga drejtimi i Partisë Demokratike, Presidentit Ilir Meta nuk i del inati me ish-kreun e opozitës. Në një intervistë të dhënë sonte, Meta ka sulmuar Bashën duke e akuzuar se e ka tradhtuar opozitarizmin. Meta ka thënë se opozita ka qenë e kapur dhe e shitur.
“Ndaj ndodhi ajo qe ndodhi me 25 prill. Madje e kam paralajmëruar me herët: Pse me këtë kecin (Lulzim Bashën) ju do përmbysni Ramën?”, ka thënë Meta.
“Kam qenë vetëm i tradhtuar dhe i provokuar nga të gjitha drejtimet. Unë nuk kam qenë i qetë sepse nuk kam pasur të qarta disa gjëra, jo në raport me zotin Basha sepse për atë kam qenë shumë i qartë dhe ja kam shprehur të gjithëve këtë fakt. Ndaj jam sot i qetë sepse jam i qartë për të ardhmen. Jam i qetë sepse i kam fituar te gjitha betejat, ne “Venecia” dhe këtu, në mbrojtje të Institucionit te Presidentit”, ka vijuar Meta.
Duke shpalosur objektivat e së ardhmes Meta ka thënë se nuk pranon asnjë propozim për një mandat të dyte si President, edhe pse në fakt askush nuk e ka përmendur si një mundësi rizgjedhjen e Metës. Meta tha se më 25 korrik 2022 (ditën kur nuk është më president) opozita do ridimensionohet.
“Sovraniteti do jetë një nga çështjet që unë do angazhohem në të ardhmen, kthimi i sovranitetit të popullit shqiptar. Kam vendosur të qëndroj në politike dhe do qëndroj gjatë. Në këtë vend, është dëmtuar sovraniteti i vendit dhe i popullit shqiptar që është zot i vendit të vet. Sovraniteti do të jetë tema kryesore, por gjithashtu do te jem i angazhuar për demokracinë , lirinë , ekonominë dhe të drejtave të qytetareve. Kjo do jetë edhe nja nga çështjet që do te jetë pjesë e ridimensionimit të opozitës pas 24 korrikut”, ka thënë ndër të tjera Presidenti Ilir Meta, i cili edhe nuk e ka ndalur sulmin e tij ndaj mazhorancës duke e akuzuar se ka kapur drejtësinë.