Kryeministri i vendit, Edi Rama ka shpërndarë disa pamje 3D të projektit të Sheshit të Flamurit i cili planifikohet të ndërtohet në qytetin bregderar të Vlorës. Përmes këtij postimi, kreu i qeverisë u ka dhënë edhe një përgjigje protestuesve të cilët nuk janë dakord me këtë projekt dhe pretendojnë se ai do të fshijë historinë e qytetit.
Në mesazhin me të cilin shoqëron pamjet e postuara në rrjetin social “Facebook”, Rama shkruan se Sheshi i Ri i Flamurit do t’i shtojë Vlorës një tjetër pjesë të bukur të mozaikut të Rilindjes së saj Urbane, ku do të mësyjë gjelbërimi, ku do të dalin në pah me të gjithë shkëlqimin e tyre objektet e historisë në atë shesh, ku një qilim i kuq prej guri do të lidhë monumentin e Pavarësisë.
Postimi i kryeministrit Rama:
MIRËMËNGJES 😊 dhe me Sheshin e Ri të Flamurit, i cili do t’i shtojë Vlorës një tjetër pjesë të bukur të mozaikut gjithnjë e më tërheqës të Rilindjes së saj Urbane, ku do të mësyjë gjelbërimi, ku do të dalin në pah me të gjithë shkëlqimin e tyre objektet e historisë në atë shesh, ku një qilim i kuq prej guri do të lidhë monumentin e Pavarësisë me “tempullin” hijezues që do të shërbejë për panaire, ekspozita, shfaqje artistike e të tjera (po vetëm si terminal autobuzësh për foltorexhinjtë jo🤣) dhe ku fantazma e ish-hotelit do të kthehet në qendrën më të madhe social – kulturore të vendit për të gjitha moshat, pa harruar aksin e rikonceptuar që lidh edhe varrezat e dëshmorëve me monumentin e Pavarësisë përmes kolonatave të “tempullit” hijezues, ju uroj një ditë të mbarë🙏