Teksa foli para gazetarëve, Ministri i Drejtësisë, Ulsi Manja ka komentuar zhvillimet e sotme në vend. Ai u ndal si fillim në shprehjet diskriminuese krahinore.
“Unë jam krenar që jam malësor”, u shpreh ministri. Mes të tjerash, Manja deklaroi se e mbështet punën e bërë nga organet e vettingut, por sa i përket gjuhës së urrejtjes, ai tha se e dënon atë dhe nuk ka më asnjë koment më shumë se kaq.
Gjithashtu, Ministri i Drejtësisë foli edhe për vendimin e legalizimit të kanabisit për qëllime mjekësore, ku nënvizoi se nuk ka asnjë shqetësim në këtë drejtim dhe janë shumë vende që e kanë të miratuar.
Në gjykimin e tij, një vendim i tillë do të ndikojë në rritjen e ekonomisë së vendit dhe përderisa qytetarët janë shprehur në favor të legalizimit, nuk ka arsye për të thënë jo.
“Natyrisht që dje janë bërë të ditura paraprakisht rezultatet e Këshillimit Kombëtar. Ka qenë një konsultim i hapur me qytetarët për një kategori temash të caktuara. Sigurisht në ditët në vazhdim sipas pyetjeve që iu janë shtruar qytetarëve do të kemi edhe një analizë më konkrete.
Por pse jo, nëse legalizimi i kanabisit për qëllime mjekësore i shërben ekonomisë së vendit dhe rritjes së punësimit, janë iniciativa që nxisin ekonominë dhe janë të paktën me aq sa u parashtrua nga rezultatet e Këshillimit Kombëtar, qytetarët shprehen në favor të saj. Ndërkohë, kanabisi për qëllime të tjera nuk besoj, ne kemi një kuadër të plotë në fuqi, kemi Kodin Penal në fuqi, por kanabisin për qëllime mjekësore nuk jemi ne të vetmit që e kemi ligjëruar”, tha Manja.