Partizani ka marrë sot fitoren e dytë radhazi në kampionat duke e parë tashmë veten në vendin e katërt, me vetëm 4 pikë larg vendit të tretë i cili të çon në Evropë. Skuadra e drejtuar nga Dritan Mehmeti përmbysën me rezultatin bindës 3-1 Teutën, në një ndeshje mjaft të luftuar të luajtur në stadiumin “Elbasan Arena”.
Në fillim ishin durrsakët ata që kaluan të parët në avantazh në minutën e 27-të me anë të Ivanov, i cili i gjeti kohën e duhur topit me një goditje me kokë, duke bërë të pavlefshme daljen e portierit Hoxha.
Por në fundin e pjesës së parë, Skuka gjeti golin e barazimit për të kuqtë. Edhe pse në fillim u anullua për pozicion jashtë loje, arbitrat u rikthyan për ta riparë në VAR, nga i cili u konstatua se pozicioni i sulmuesit dibran ishte i rregullt sepse topin i’a kishte pasur një lojtar i Teutës. Pjesa e parë mbyllet 1-1.
Në të dytën është Bitri ai që realizon në minutën e 53-të. Qendërmbrojtësi beratas u zhyt me kokë, duke mos i dhënë asnjë mundësi reagimi portierit mik. Partizani mbron këtë përmbysje deri në fund, madje shënon edhe golin e tretë.
Në ndeshjen tjetër, Vllaznia dhe Laçi ndajnë nga një pikë mes tyre në barazimin pa gola. Shkodranët nuk fitojnë prej 5 ndeshjeve në kampionat, ndërsa Shpëtim Duro rikthehet me një pikë në stolin kurbinas, që duket pozitive në transfertë, pasi Laçi mban vendin e dytë.