Deputeti i Partisë Demokratike, Belind Këlliçi, ka dhënë një deklaratë për mediat pas përfundimit të Kongresit të PS-së, ku deklaroi se gjatë tij nuk u dha asnjë alternativë për zgjidhjen e krizës.
Këlliçi e cilësoi Kongresin e socialistëve që u zhvillua sot si një Kongres anti-SPAK, duke theksuar se është kriminale mënyra se si Edi Rama i bëri sot presion drejtësisë.
“Në vend që të tregonte investimet, Rama kërcënoi me burg opozitën. Sot shqiptarët panë se si imitimi i praktikave komuniste sot kaloi në perfeksion. Sot Ramën do ta kishin zili dhe diktatorët më famëkeq të globit për shfaqjen e shëmtuar që ai na dhuroi. Është i pafalshëm presioni që Rama ushtroi ndaj organeve të drejtësisë. Frika që ka kapur Ramën e detyroi t’i bënte shantazh drejtësisë, duke treguar se drejtësinë e trajton si organizatë të partisë së tij. Unë besoj që partnerë – që kanë hartuar reformën në drejtësi – të kryqëzojnë këtë sjellje të diktatorit Rama.
Sot nuk u diskutua asnjë problem, asnjë alternativë dhe asnjë lehtësim për krizën ekonomike. U fol për urrejtjen ndaj opozitës për faktin që opozita e kapur është një ëndërr që nuk ekziston më. Sot përballë Ramës ndodhet një opozitë reale që do ia shkurtojë ditët Ramës një orë e më parë. Rama u dha porosi delegatëve që termin Rilindje të mos e përmendin më. Rama u tregoi sot shqiptarëve se oferta e vetme që ka për vendin është hashashi. Asnjë fjalë për të rinjtë e këtij vendi, asnjë fjalë për varfërinë që ka pllakosur vendin. Nuk foli për ministrat e tij që janë pas hekurave. Iu hakërrye drejtësisë, për shkak se ka dënuar zyrtarët, për shkak se kanë shkelur ligjin dhe e kërcënoi. Rama ishte i tmerruar, pasi laku po shtrëngohet”, tha Këlliçi.