Gazetari Milaim Zeka tha në një intervistë televizive se Sali Berisha ka bashkuar Shqipërinë me Kosovën duke ndërtuar Rrugën e Kombit. Për shpalljen “non grata” të Berishës nga Departamenti Amerikan i Shtetit, Zeka tha se ish-kryeministri u fut në listën e zezë falë dezinformacionit të spiunëve të Beogradit.
“Spiunët e Beogradit që flasin shqip dhe Tirana zyrtare u ka dhënë prioritet në gazetari, politikë, gjithandej. SHBA-të nuk janë engjëj që nga qielli të tubojnë informacione, por tubojnë informacione nga kjo shoqëri civile e cila dezinformon në Ambasadën Amerikanë në Prishtinë, Shkup dhe Tiranë”, tha Zeka.
Lidhur me Edi Ramën, Zeka u shpreh se edhe Enver Hoxha do ta kishte zili pasi nuk ka pasur pushtet sa ky i fundit. Zeka tha se në kohën e Enver Hoxhës, s’ka pasur kontroll absolut mbi shtetin dhe median.
“Enver Hoxha do ja kishte lakminë Ramës, në kohën e tij s’ka pasur kontroll absolut mbi shtetin, mediat. Nuk është tallur Hoxha me gazetarët siç tallet Rama. Rama është kthyer në një Erdogan 100% i Shqipërisë.
Ka pafytyrësinë e tij më të madhe për tu tallur me qytetarët dhe me mediat. Qeveria në Shqipëri dhe në Kosovë na kanë vrarë dhe ëndrrat. Qytetarët në Kosovë më thonë se mezi presin të largohen nga vendi, të arratisen”, tha Zeka.