Deputeti socialist Erion Braçe kërkoi që autoriteti i Konkurrencës të jetë më aktiv në situatën e rritjes së çmimeve në treg pasi bordet sipas tij janë të përkohshme ndërkohë që ajo që duhet te jetë e përhershme është liria dhe konkurrenca në tregje. Sipas Braçes çmimet duhet të mos caktohen më siç po ndodh aktualisht, por me rregullat e konkurrencës së lirë.
“Sot edhe pikat e bardha shesin me të njëjtin çmim si pikat e brenduara në tregun e hidrokarbureve, ndërkohë që gjithë jetën ka qenë 10 deri 15 lekë më poshtë sesa pikat e brenduara. Kanë unifikuar çmimin dhe konkurrence nuk ka më. E njëjta histori është dhe te produktet ushqimore, aty ku ka kontroll, se atje ku nuk ka kontroll çmimet janë më të unifikuar dhe konkurrenca është zbehur, thuajse nuk ekziston”.
Edhe për deputeten demokrate Jorida Tabaku vendosja e çmimeve me borde nuk është zgjidhja e duhur, ndërkohë që kërkoi që autoriteti i konkurrencës të jetë më aktiv në hetimin e tregjeve në kushtet e situatës monopol dhe oligopol.
“Hetime të cilat mund të jenë në periudhë kohore më të shkurtër, se ndërkohë që autoriteti konkurrencës merr një vendim dhe shkon në gjykatë ankimohet dhe gjobat mund të pezullohet, dinamika në tregje ndryshon. Një nga kompanitë që ju vendosni gjobë sigurisht që nuk rrezikon të dalë nga tregu. Këtu bëhet fjalë për struktura oligopol në disa raste kemi monopol. Ka tregje që kanë kompani që siç duket po përfitojnë nga kriza”.
Deklarata u bënë në komision ekonomisë gjatë raportimit vjetor të autoritetit të konkurrencës për raportin e vitit 2021. Kreu i autoritetit të konkurrencës thotë se ka nisur hetimi për tregun e produkteve të shportës si dhe atë të hidrokarbureve.