Monika Kryemadhi, kryetarja e LSI, e cila ka denoncuar vazhdimisht aferën e inceneratorëve, thotë se dokumentet dhe faturat financiare për këtë çështje ia kanë dërguar në email nga shërbimi informativ i një vendi që ajo refuzoi të tregojë se cili ishte. Kryemadhi u shpreh se këto dokumente i janë dërguar nga një adresë e panjohur nga jashtë Shqipërisë.
“Sa i përket çështjes së inceneratorëve, jo se ne jemi më të zotët, por fati ishte që bashkëpunimi që patëm çoi në atë pikë që ne morëm dokumente dhe faturat financiare.
Por si u gjetën faturat financiare?
Monika Kryemadhi: “Për hir të së vërtetës mua më kanë ardhur me email, IP është jashtë Shqipërisë.
Kryemadhi rrëfeu se e tërë dosja i erdhi nga një institucion zyrtar, që detajoi se ishte institucion informativ, duke lënë të kuptohet se shërbimet sekrete të huaja i sollën dosjen e skandalit të inceneratorëve.
Kryemadhi shtoi se po ashtu i kanë ardhur dhe “shumë materiale të tjera që ua kam vënë në dispozicion partnerëve ndërkombëtarë dhe institucioneve të tjera”.
Duke u ndalur te dosja që tha se i erdhi nga një shërbim i huaj informativ, zonja Kryemadhi tha se ia ka vënë në dispozicion dhe prokurorisë shqiptare.