Në një konferencë për mediat, ish-kryeministri Sali Berisha ka kërkuar shfuqizimin e menjëhershëm të bordeve të ngritura nga qeveria për transparencën e çmimeve. Ai deklaroi se në një situatë si kjo, zgjidhja duhet të jetë kompensimi i qytetarëve për çmimet e shportës.
Gjithashtu, Berisha nënvizoi se qeveria duhet të kthehet në mburojë ndaj qytetarëve për rritjen e çmimeve dhe jo të grabisë xhepat e familjarëve nëpërmjet Bordeve të krijuara.
Madje, ndër të tjera ai përmendi edhe Bitcoin-in, ku tha se ai është i kontrolluar nga qeveria dhe gllabëron energji falas nga jugu deri në veri.
“Do të thoja që kanë zgjedhur një ilaç toksik referuar bordeve. Ajo vetë po jep shembull në këtë krizë me rritjen e çmimeve, tre ditë më parë deklaruan se për ata që shpenzojnë mbi 700 kë/orë do të shumëfishohet çmimi i energjisë. kë godasin në këtë mënyrë? Godasin dhjetëra mijëra biznese të vogla. Ndërsa Bitcoin i kontrolluar nga qeveria gllabëron nga jugu në veri energji gratis, sepse gjerësisht flitet se kontrollin e Bitcoin e kanë marrë klanet më të larta qeveritare. Unë jam këtu për t’u thënë qytetarëve shqiptarë se zëri i tyre kundër spekulimit është jetik, po ashtu edhe kundër rritjes së çmimit për t’i thënë stop kësaj vjedhje të madhe që i bëhet portofolave të tyre. Unë i garantoj se nëse nuk do t’i themi stop kësaj vjedhjeje çmimet e sotme do të harrohen, nga çmimet që do të vijnë disa herë më të larta. Është koha që çdo shqiptarë të mendojë për buxhetin familjar që po i grabitet. A mund të imagjinoni ju që ne të kemi çmimet më të larta të energjisë në një kohë kur ne e prodhojmë atë”, deklaroi Berisha.