Socialistët Ilir Beqaj e Safet Gjici nuk e fshehin gëzimin e tyre për vendimin e fundit të qeverisë për ndërtimin e aeroportit të Kukësit. Madje ata kanë publikuar në llogaritë e tyre në Facebook të njëjtin tekst.
Postimi i Gjicit dhe Beqes:
Miqtë e mi kuksianë,
Më lejoni të ndaj me ju lajmin e shumëpritur, për të gjithë ne dhe banorët e zonës!
Me vendimin e marrë në mbledhjen e sotme, qeveria i ka hapur udhë ndërtimi të aeroportit të Kukësit.
Punimet do të nisin me hyrjen në fuqi të VKM-së, të miratuar sot për nënshkrimin e Kontratës së Koncensionit për “Rehabilitimin, operimin, transferimin e Aeroportit te Kukësit” dhe parashikohet të zgjasin 24 muaj.
Jam i sigurt, që ndërtimi i aeroportit të Kukësit do të ketë një ndikim të rëndësishëm në zhvillimin ekonomik të zonës, për ta kthyer atë në një hapësirë me mjaft interes për investime.
Ta gëzojmë së bashku!