SPAK i ka dhënë një tjetër goditje Alqi Bllakos, teksa mësohet se përveç procedimit penal ndaj tij, Prokuroria e Posaçme ka nisur edhe një hetim pasuror ndaj ish-deputetit socialist, ku do të kryehn një sërë verifikimesh sa i takon pasurisë së tij.
Krahas sekuestrimit të apartamentit në pronësi të babait të tij, SPAK ka vënë në shënjestër edhe llogaritë e tij bankare.
Gjithashtu, Prokuroria e Posaçme Kundër Korrupsionit dhe Krimit të Organizuar po kryen veprime hetimore, ku sipas burimeve, institucioni i akuzës ka kërkuar informacion në bankat e nivelit të dytë për të verifikuar llogaritë bankare që mund të ketë Bllako.
Gjithnjë bazuar në informacionet burimore pranë SPAK, mësohet se shkresa për të verifikuar pasuritë e Bllakos janë dërguar edhe në institucionet e agjencitë e pronave, për të parë nëse ka pasuri në emër të ish deputetit dhe familjarëve të tij.
Hetim pasuror po kryhet edhe për ish-ministrin e mjedisit Lefter Koka, i cili përveç përfshirjes në aferën e inceneratorëve, akuzohet edhe për pastrim parash.
Sipas burimeve, edhe për Kokën po ndiqet e njëjta procedurë, ku përveç sekuestrimit të kantinës së pijeve alkolike, dhe katër pronave, po verifikohen edhe llogaritë bankare të tij e familjarëve të tij. Koka akuzohet edhe për pastrim parash. Sipas SPAK për aferën e dy inceneratorëve ai ka përfituar në formën e ryshfetit rreth 4.9 milion euro.