UEFA dhe Federata Shqiptare e Futbollit vijojnë përgatitjet e tyre intensive me qëllim organizimin me sukses të finales së UEFA Conference League, e cila do të luhet në datë 25 maj në stadiumin kombëtar “Air Albaia”, në Tiranë.
Të gjitha grupet e punës që janë ngarkuar për t’u kujdesur për organizimin e kësaj ngjarjeje madhore të futbollit europian dhe historike për Shqipërinë janë çdo ditë në terren duke vijuar plotësimin e detyrave të tyre..
Ndërkohë, është vënë re një interesim i madh i tifozëve për të ndjekur “live” në stadium këtë ndeshje. Për këtë arsye, Federata Shqiptare e Futbollit edhe një herë bën me dije se të gjithë të interesuarit për të blerë bileta për finalen e UEFA Conference League mund të regjistrohen në linkun
https://europaconferenceleague-sales.tickets.uefa.com/ dhe të krijojnë një llogari personale.
Sipas informacionit zyrtar të UEFA-s pritet që shitja e biletave të nisë në ditët në vazhdim. Pas krijimit të llogarisë në faqen zyrtare, personat e përzgjedhur nga UEFA do të njoftohen për hapat e mëtejshëm që duhet të ndjekin në mënyrë që të pajisen me biletat e finales.
Përveç biletave të rezervuara për tifozët e dy ekipeve finaliste, UEFA do të nxjerrë në shitje edhe një numër të caktuar biletash për të gjithë të apasionuarit e futbollit që duan të ndjekin këtë finale.
Sa i përket garës, kanë mbetur katër skuadra që pretendojnë për trofeun, teksa në mesjavë do të luhen edhe dy çiftet gjysmëfinale, Leicester – Roma dhe Feynoord – Olimpique Marseille. Nga këto dy çifte do të përzgjidhen edhe dy finalistet që do të luajnë në Tiranë më 25 maj.