Një prej mjekëve në Spitalin e Traumës thotë se të lënduarit nga aksidenti ku u përfshi autobusi i “Unazës së Re”, kanë dëmtime të lehta në kokë dhe trup.
Ai thotë se nëse gjendja e tyre do të vijojë të jetë stabël, ditën e nesërme mund të lënë spitalin.
“Aktualisht asnjë prej tyre nuk është në gjendje të rëndë shëndetësore. Shumica kanë dëmtime tek koka dhe në pjesë të trupit. Nëse nuk do të kenë asnjë problem, nesër do u bëjmë kontroll mjekësor dhe do të largohen më pas” – tha mjeku.
Ndërkohë Kryebashkiaku Erion Veliaj i cili ndodhet në Spitalin e Traumës, tha se dy prej djemve të cilët ishin në makinën e cila u përmbys në Lanë, u shpëtuan nga dy kalimtarë të rastit.
“Menjëherë pas ngjarjes, disa kalimtarë të rastit bënë të mundur nxjerrjen e dy djemve që ndodheshin në automjetin brenda. Është fat i mirë pasi automjeti ishte përmbysur dhe ndërhyrja e kalimtarëve ishte shumë e nevojshme. Këtu nuk kishte as neglizhencë dhe asnjë gabim, të dy nuk ishin nën efektin e alkoolit. Duhet që policia të zbardhë se si ka ndodhur ngjarja” – tha Veliaj.