Sot u mblodh Konfereca e Kryetarëve, ku bëri bashkë Taulant Ballën dhe Enkelejd Alibeajn, për të diskutuar mbi emrin e ri të presidentit. Mbledhja u transmetua online, dhe kjo kërkesë u shtrua nga Alibeaj për të pasur më shumë transparencë.
Por për deputeten e PD dhe anëtaren e Komisionit të Rithemelimit Albana Vokshi, Alibeaj nuk është i mandatuar për të negociuar për presidentin. Në një intervistë për A2 CNN, Vokshi tha se mes Bashës dhe Ramës ka një marrëveshje të fshehtë, por shton se ky i fundit nuk ka tagër për të përcaktuar se kush është opozita e vërtetë.
“Unë kam qenë pjesë e Konferencës së Kryetarëve edhe në mandatin e kaluar, edhe në këtë mandat. Në mandatin e kaluar ka pasur raste që janë transmetuar online, sot më thanë që ishte kërkuar nga Alibeaj për tu transmetuar online. Në fakt është kryetarja e Kuvendit e cila përcakton se cila konferencë do të transmetohet.
Por kjo nuk përcakton vijën politike të PD dhe Enkelejd Alibeaj nuk është i mandatuari i PD për të bërë negociata për presidentin.
Nuk është Edi Rama ai që përcakton se kush është opozita e vërtetë, nuk është Edi Rama ai që përcakton se kush janë negociatorët në këtë rast. Ne e dimë që ka një pakt Lulzim Basha-Edi Rama, një pakt që vijon prej muajsh në mos prej vitesh.
Por Kuvendi i 30 prillit ka një lajm të mirë për të gjithë qytetarët. I është dhënë fund koha që opozita merrej me veten e saj, tashmë ka një opozitë të vërtetë pas 30 prillit.” – tha Vokshi.