Ky ishte një sezon brilant për Tiranën, e cila e kurorëzoi sot atë me një ndeshje të jashtëzakonshme kundër Partizanit duke siguruar titullin e 26-të në historinë e tyre. Bardheblutë mundën demat me rezultatin 1-2 në Elbasan Arena dhe tashmë kanë të drejtë të festojnë pasi matematikisht është mbyllur gjithçka, ndonëse kampionatit i kanë mbetur edhe pak javë për t’u luajtur. Pas këtij triumfi madhështor, Presidenti i Tiranës, Refik Halili dha një deklaratë për mediat ku u shfaq mjaft i gëzuar dhe me emocion.
“Janë lot gëzimi. Fituam titullin sot. Jemi të gjithë të lumtur, edhe familja ime. Falenderoj edhe bashkëshorten time që nuk ka ardhur kurrë në stadium. I shtojmë edhe një trofe klubit tonë, që është më i madhi në Shqipëri. Kjo ndeshje na shijoi shumë, sepse luajtëm me rivalin tonë të përhershëm. Ka një luftë sportive për 90 minuta dhe pastaj jemi shokë. Falenderoj Shehin, që ka qenë një prind i dytë. Falenderoj Osmanin që ka gjetur lojtarët. Falenderoj tifozët, që edhe pse jemi në kohë krize e gjejnë mundësinë dhe vijnë na mbështesin. Ne shpresojmë që në vitet e ardhshme, të jemi një skuadër e kujdesshme. Jemi lehtësuar shumë nga ato të shkuara, që nuk dua ti kujtoj. Kemi edhe pak punë ti dërgojmë 0-0 (borxhet). Festën do ta bëjmë në Sheshin Skënderbej, ku besoj do të kemi një leje nga bashkia. Do të bëjmë një festë madhështore, sic i takon këtij grupi” – u shpreh ai.