Presidenti i Ukrainës Volodymyr Zelensky, me anë të një postimi në rrjetin e tij social “Twitter”, ka bërë me dije se ka zhvilluar një bisedë telefonike me kancelarin gjerman Olaf Scholz.
Ai tha se kishte folur me kancelarin gjerman Olaf Scholz dhe kishte diskutuar për ndihmën mbrojtëse, bashkëpunimin në sektorin e energjisë dhe rritjen e sanksioneve ndaj Rusisë si një forcë pushtuese.
Presidenti ukrainas tha se të dy biseduan për çështje në lidhje me “agresorin rus”.
“Ne e vlerësojmë nivelin e lartë të dialogut me Gjermaninë dhe mbështetjen në luftën tonë”, shkroi ai.
Zelensky e kishte ftuar më parë Scholz-in të bënte një deklaratë të fuqishme politike duke vizituar Kievin të hënën më 9 maj, ditën kur udhëheqësit gjermanë kanë udhëtuar shpesh në Moskë për të shënuar përkujtimin e Ditës së Fitores së Rusisë për humbjen e Gjermanisë naziste në Luftën e Dytë Botërore.
Ajo vizitë e veçantë nuk u zhvillua dhe Scholz përkundrazi ishte në Berlin, i shoqëruar nga presidenti francez Emmanuel Macron, ku Porta e Brandenburgut u ndriçua me ngjyrat e flamurit ukrainas si shenjë mbështetjeje.
Scholz kishte hezituar të vizitonte Ukrainën pasi Kievi nuk ishte i gatshëm të priste presidentin gjerman Frank-Ëalter Steinmeier.
Steinmeier është jopopullor në Kiev, sepse ai është i lidhur me një politikë të mëparshme gjermane për ndjekjen e tregtisë së ngushtë dhe lidhjeve të tjera me Rusinë e Vladimir Putinit.