Më datë 27 maj, vëllezërit Donald dhe Romeo Veshaj do të dalin para Gjykatës së Lartë pasi janë në një proces gjyqësor për një ngjarje që ka ndodhur 5 vjet më parë. Ata janë dënuar nga Gjykata e Vlorës në vitin 2017 për veprën penale plagosje e rëndë me dashje të kryer në bashkëpunim.
Prokuroria e Vlorës ka dërguar rastin për rishqyrtim në Gjykatën e Lartë dhe kjo e fundit e ka regjistruar rekursin dhe ka caktuar 27 majin si datën kur do të mbahet seanca e parë. Ende mbetet e paqartë çfarë ka ndodhur pasi ngjarja ka kaluar pa zhurmë.
Kujtojmë se binjakët janë kthyer në emrat më të përfolur pas përfundimit të “Big Brother VIP”. Sidomos Donaldi, i cili është komentuar shumë pas ngjarjeve që ndodhën brenda shtëpisë së famshme, nga puthja me Bora Zemanin te lidhja me Beatrix Ramosaj.
Çfarë thotë “Neni 88” për akuzën “Plagosje e rëndë me dashje”?
Plagosja e kryer me dashje që ka sjellë si pasojë gjymtimin, shëmtimin ose çdo dëmtim tjetër të përhershëm të shëndetit, ndërprerjen e shtatzënisë, ose ka qenë e rrezikshme për jetën në çastin e shkaktimit të saj, dënohet me burgim nga tre gjer në dhjetë vjet.
Po kjo vepër, kur është kryer kundër disa personave, kundër personit që është bashkëshort, ish bashkëshort, bashkëjetues apo ish-bashkëjetues, gjini e afërt ose krushqi e afërt me autorin e veprës penale, ose kur ka sjellë si pasojë vdekjen, dënohet me burgim nga pesë deri në pesëmbëdhjetë vjet.
