Rusia ka dëbuar 10 diplomatë rumunë dhe një bullgar. Kjo si hakmarrje për një lëvizje të ngjashme nga të dy vendet pas pushtimit të plotë të Ukrainës nga Moska.
Ministria e Jashtme rumune tha në një deklaratë të premten se “Federata Ruse shpalli persona non grata 10 punonjës të ambasadës rumune në Moskë”.
Lajmi u konfirmua nga Moska dhe pason dëbimin më 5 prill të 10 diplomatëve rusë “veprimtaritë e të cilëve shkelën Konventën e Vjenës për Marrëdhëniet Diplomatike”.
Ministria e Jashtme ruse tha gjithashtu të premten se “kundërshton me vendosmëri përpjekjet e pabaza të palës rumune për të fajësuar Rusinë për krimet e luftës në Ukrainë”.
“Rrjedha e gënjeshtrave të plota”
Rumania thirri ambasadorin rus në Bukuresht, Valery Kuzmin, të enjten për të protestuar ndaj një artikulli të botuar në faqen e internetit të ambasadës ruse, ku thuhej se “një rrjedhë gënjeshtrash, falsifikimesh, provokime të organizuara dhe dezinformata” për atë që po ndodhte në Ukrainë ishte “krijuar dhe financuar nga Perëndimi kolektiv”.
Që nga pushtimi rus i Ukrainës më 24 shkurt, vendet perëndimore kanë vendosur disa raunde sanksionesh dhe kanë dëbuar dhjetëra diplomatë rusë.
Moska ka premtuar se do t’i përgjigjet secilës prej këtyre masave dhe tashmë ka dëbuar dhjetëra diplomatë perëndimorë.