Shitja e Chelseat po bëhet gjithnjë e më e komplikuar pë Roman Abramovich. Përtej vonesës në gjetjen e një oferte që i bindi të gjitha palët e përfshira, tashmë ka fërkime të minutës së fundit, që tani mund të llogariten në miliarda euro.
Oferta fituese, e cila aktualisht është në pritje të miratimit nga qeveria britanike, është ajo e bosit amerikan Todd Boehly, i cili ofroi 4.25 miliardë paund për të marrë ‘Blutë’. Abramovich e kishte nxjerrë klubin në shitje për shkak të sanksioneve të vendosura ndaj tij pas pushtimit të Ukrainës nga Rusia.
Nga sa njofton “BBC”, qeveria e Mbretërisë së Bashkuar ka “shqetësime serioze” në lidhje me planet e Abramovich pasi oligarku rus ende nuk ka rënë dakord “për një strukturë shitjesh që u jep ministrave besimin se të ardhurat do të shkojnë për bamirësi”.
Shitja, e cila duhet të përfundojë përpara 31 majit, tani është gjithashtu e rrezikuar nga një ndërhyrje e mundshme në marrëveshje nga një kompani e lidhur me Abramovich dhe që besohet se do të kontribuojë rreth dy miliardë euro.