Një 55-vjeçar nga Mallakastra është arrestuar ditën e sotme në sajë të operacionit “Gryka”, për kultivim të lëndëve narkotike.
Në pranga ka rënë Arjan Çanaj, ndërsa është proceduar në gjendje të lirë babai i tij, 72-vjeçari Sadik Çanaj.
Policia bën me dije se në fshatin Klos, në një parcelë rrushi, janë gjetur dhe sekuestruar 200 fidanë të dyshuar narkotikë cannabis sativa.
Njoftimi i policisë:
Finalizohet pas një hetimi 1-mujor, operacioni policor i koduar “Gryka”, për parandalimin e kultivimit të bimëve narkotike.
Gjenden dhe sekuestrohen 200 fidanë të dyshuar narkotikë cannabis sativa.
Arrestohet në flagrancë autori i dyshuar i kultivimit, procedohet në gjendje të lirë babai i tij.
Në vijim të punës për parandalimin, evidentimin dhe goditjen e veprimtarisë kriminale në fushën e kultivimit të bimëve narkotike, efektivët e Komisariatit të Policisë Mallakastër kanë vijuar kontrollet e imtësishme të territorit. Si rezultat i një hetimi njëmujor, në bashkëpunim me Prokurorinë pranë Gjykatës së Shkallës së Parë Fier, është finalizuar operacionin policor i koduar “Gryka”.
Gjatë operacionit u arrestua në flagrancë shtetasi A. Ç., 55 vjeç dhe u procedua në gjendje të lirë, babai i tij, shtetasi S. Ç., 72 vjeç, banues në Klos, Mallakastër, pasi në fshatin Klos, në një parcelë rrushi, shërbimet e Policisë gjetën dhe sekuestruan 200 fidanë të dyshuar narkotikë cannabis sativa.
Materialet procedurale i kaluan Prokurorisë pranë Gjykatës së Shkallës së Parë Fier, për veprime të mëtejshme, për veprën penale “Kultivimi i bimëve narkotike”, kryer në bashkëpunim.