Prokuroria e Posaçme Kundër Korrupsionit dhe Krimit të Organizuar, SPAK ka marrë të pandehur anëtaren e Komisionit të Pavarur të Kualifikimit, KPK, Etleda Çiftija.
Ndaj Etleda Çiftjas rëndojnë akuzat “deklarim i rremë” dhe “falsifikim” në formë përdorimi.
Por megjithëse Etleda Çiftja është marrë e pandehur nga SPAK, ajo nuk është pezulluar nga detyra.
Edhe pse deklarimi i rremë është kryer nga Çiftja në komisionet e përzgjedhjes së saj për një pozicion në Komisionin e Pavarur të Kualifikimit, ajo ka vijuar të jetë pjesë e trupave që gjykojnë subjektet e rivlerësimit.
Dy standardet
Ajo që vihet re është standardi i dyfishtë që është ndjekur për anëtarët e Komisionit të Pavarur të Kualifikimit. Edhe anëtari tjetër i KPK-së Ardian Hajdari u kallëzua penalisht për të njëjtin fakt, si dhe për fshehje të ardhurash. Rreth dy javë më parë SPAK i ka kërkuar gjykatës respektive gjykimin e Ardian Hajdarit për veprat penale “fshehje e të ardhurave” dhe “…deklarim të rremë të pasurisë…”, ndërsa u pushua procedimi për “falsifikim të dokumenteve” me argumentin se dy akuzat e para e përfshijë në vetvete.
Por nëse Ardian Hajdari u pezullua menjëherë nga detyra, çuditërisht kolegia e tij ndaj së cilës rëndojnë të njëjtat akuza për deklarim të rremë dhe falsifikim vijon që të ushtrojë detyrën normalisht duke pasur në dorë fatin e subjekteve të rivlerësimit.
Kujtojmë këtu që i njëjti kallëzim është bërë edhe për i ish-anëtarin tjetër të KPA-së, Luan Daci, i cili tashmë ka marrë dënimin nga GJKKO dhe më pas u shkarkua nga detyra. Ai u dënua me 6 muaj burg konvertuar në një vit shërbim prove dhe kushtin që mos ushtrojë funksione publike. Hetimet e SPAK bindën Gjykatën e Posaçme kundër Krimit e Korrupsionit dhe Apelin e GJKKO të dënojë Luan Dacin me akuzën e falsifikimit.
Pra, edhe pse me të njëjtat akuza për falsifikim dhe deklarim të rremë, nëse Hajdari është pezulluar si anëtar i KPK-së dhe Luan Daci akoma më keq, u dënua me burg, por që iu konvertua në shërbim prove, për Etleda Çiftjen ligji nuk vepron njësoj.
Çiftja u zgjodh në qershor 2017 nga Kuvendi i Republikës së Shqipërisë në postin e Komisioneres pranë Komisionit të Pavarur të Kualifikimit.