Histori rrëqethëse vijnë nga Ukraina, e cila vijon të jetë nën pushtimin rus prej më shumë se tre muajsh. “The Sun” sjell sot historinë e tmerrshme të një vajze, të cilës i vranë nënën para syve.
Iryna Perlifon, 52 vjeçe, dhe vajza Karolina, 29 vjeçe, po përpiqeshin të tmerruara të iknin, kur Kharkiv u pushtua. Por, kur dy ushtarë rusë u ofruan ndihmë dhe u përpoqën t’i fshihnin, të katërt u qëlluan.
Iryna u godit në kokë dhe vdiq në krahët e vajzës së saj, njëri nga ushtarët rusë u vra gjithashtu, ndërsa tjetri mbeti i plagosur rëndë, por mundi të largohej.
Ndërkohë, 29-vjeçarja Karolina mbeti e plagosur, por mundi të mbijetonte dhe tani i ka treguar “The Sun” përvojën e saj të hidhur, ngjarje që po hetohet si një krim lufte.
“Mamaja ime po drejtonte makinën, kur e zuri paniku. U ndalëm dhe pamë dy ushtarë rusë. Ne kishim frikë për më të keqen, por ata në fakt na ndihmuan”, është shprehur e reja.
Rusët i kanë fshehur dy gratë pranë disa garazheve dhe kanë qëndruar me ta për 15 minuta, por një grup tjetër ushtarësh i panë dhe hapën zjarr. Karolina tha se “ushtari mik po lutej, duke thënë: mos qëlloni, mos qëlloni. Ai filloi të qajë. U bënë shumë të bërtitura. E kisha fytyrën poshtë. Gjithçka që dëgjoja ishin të shtënat. Kishte gjak kudo, kur ngrita sytë. Isha e bindur se do të vdisja. U ngrita dhe fillova të dridhesha, sepse mund të shihja mamin. I gjeta plumbin në kokë dhe kuptova se kishte vdekur. Kisha shumë frikë. Nuk mund ta besoja atë që ndodhi”, ka treguar Karolina.
Ajo u largua, ndërsa të shtënat vazhduan, dhe gjithashtu arriti të fuste rusin e plagosur në një makinë, për ta shpëtuar.
Ajo ka shtuar më tej në rrëfimin e saj se “Askush nuk e meriton këtë. Ne po përpiqeshim të dilnim. Është e tmerrshme. Më ka shkatërruar jetën. Jam shkatërruar nga pikëllimi”.