Një 43-vjeçar mbeti i vrarë pas një sherri banal për ankorimin e varkave në brigjet e Sarandës.
Kledi Koka u qëllua me thikë në pjesën e shpinës, duke ndërruar jetë pak orë më vonë. Pavarësisht se u dërgua me urgjencë në Spitalin e Sarandës, ndërhyrja e mjekëve nuk bëri dot asgjë për ta shpëtuar atë për shkak se thika kishte dëmtuar organe jetësore dhe për pasojë, kishte humbur sasi të madhe gjaku.
NGJARJA
Një sherr i nisur paraditen e djeshme për ankorimin e barkës së peshkimit degjeneroi në përdorimin e armëve të ftohta që i mori jetën peshkatarin Kledi Koka.
Ngjarja u regjistrua në shëtitoren e qytetit bregdetar. Pavarësisht se Koka u transportua me urgjencë fillimisht në Spitalin e Sarandës dhe më pas me helikopter në drejtim të Tiranës, ai nuk mundi t’u mbijetonte plagëve të marra.
Mbi viktimën u qëllua disa herë me thikë në pjesën e shpinës. Për pasojë, Koka mori plagë të thella në mushkri, duke humbur sasi të mëdha gjaku. Trupi i pajetë është dërguar në morg për t’iu nënshtruar autopsisë mjekoligjore.
ARRESTIMI
Brenda një kohe të shkurtër, forcat e rendit kanë arrestuar autorin e dyshuar, shtetasin Jorgo Golemi, ndërsa kanë sekuestruar edhe thikën, me të cilën ai kreu krimin e rëndë.
“Në vijim të informacionit paraprak, përmes të cilit njoftuam se, në shëtitoren e Sarandës, gjatë një konflikti për motive të dobëta, shtetasi J. G. goditi me mjet prerës, në kurriz, shtetasin K. K., 43 vjeç, sqarojmë se, si pasojë e plagëve të marra shtetasi K. K. ka ndërruar jetë.
Brenda një kohe të shkurtër, shërbimet e Komisariatit të Policisë Sarandë kanë bërë të mundur arrestimin e shtetasit J. G. Në cilësinë e provës materiale është sekuestruar mjeti prerës (thika), me të cilën dyshohet se shtetasi J. G. ka goditur shtetasin K. K. Grupi hetimor ndodhet në vendngjarje dhe po punon për zbardhjen e rrethanave të ngjarjes”, sqaroi Policia e Vlorës.
AUTORI ME PRECEDENTË
Autori i ngjarjes së rëndë që i mori jetën peshkatarit 43- vjeçar është me precedentë të mëparshëm penalë. Genti alias Jorgo Golemi, 43 vjec, gjithashtu peshkatar, rezulton të jetë dënuar më parë në shtetin grek për trafik droge.
Gjithashtu, ai është dënuar edhe në Sarandë për “Prodhim dhe shitje të lëndëve narkotike” si dhe për “Mbajtje pa leje të armeve dhe municionit”. Në vitin 2006, Golemi u arrestua nga Policia me 400 gramë marijuanë, kapsolla detonatorë dhe fitila zjarr përcjellës.